आयोजनाको मनोपरी हद भयो उचित क्षेतीपुर्ती नदिए शव बुझ्दैनौं – मृतकका आफन्त थापा
रामेछाप १३ फागुन
तीन दिनअघि कामको सिलसिलामा मृत्यु भएका मजदुरका परिवारलाई क्षतिपूर्ति र रोजगारी लगायतको माग राख्दै लिखु जलविद्युत् आयोजनामा कार्यरत मजदुरका आफन्तले शव बुझ्न मानिरहेका छैनन् ।
दुगड समूहबाट निर्माणाधीन लिखु १ जलविद्युत् आयोजनामा कार्यरत सवारी चालक रामेछाप जिल्ला उमाकुण्ड गाउँपालिका ३ कुभुकास्थलीका ४१ वर्षीय उद्योग बहादुर कटुवालको बिहीबार काममै रहेका बेला मृत्यु भएको थियो । गाडी पुछ्ने क्रममा बेहोस भएपछि उनलाई उपचारका लागि आयोजनाबाट संचालित किन्जा स्वास्थ्य केन्द्रमा ल्याइएकोमा उपचार सुरु नगर्दै स्वास्थ्य केन्द्रले उनको मृत्यु भएको घोषणा गरेको थियो ।
मृतकका आफन्त सुरेश थापाले आयोजनाले कटुवालको परिवारलाई उनी बिरामी भएको जानकारी उचित समयमा नदिएको गुनासो गरे । ‘बिरामी भएको सूचना बेलैमा पाएको भए हामी हेलिकप्टर मगाएर भए पनि उपचारको प्रयत्न गर्ने थियौं,’ थापाले भने, ुउहाँको बेलैमा उपचार गर्न नपाएर मृत्यु भयो । बेहोस भएर ढलेपछि उनलाई ट्याङकरमा हालेर किन्जा पठाइएको थियो । मजदुरको ज्यान माथि आयोजनाले लापरबाही गर्यो ।ु
मृतक कटुवालकी ढेड महिनाको सुत्केरी पत्नी संगीता थापा कटुवाल उचित क्षतिपूर्ति, परिवारका सदस्यलाई रोजगारी र बालबच्चाको पठनपाठनको ३ बुँदे मागसहित किन्जामा बसेकी छन् । स्वास्थ्य चौकीमा रहेको पतिको शव बुझ्न संगीताले मानिरहेकी छैनन् । परिवारजनले कम्तीमा ३० लाख क्षतिपूर्तिसहितको माग अघि सारेको तर आयोजनाले उक्त माग पूरा गर्न नसक्ने जनाएको छ । कटुवालका डेढ महिनाको सहित ४ सन्तान छन् । आयोजनाका साइट इन्चार्ज इन्द्रजित कार्कीका अनुसार व्यवस्थापन पक्षको शुक्रबार काठमाडौंमा भएको बैठकले मृतकका आफन्तलाई काजक्रिया खर्च ५ लाख उपलव्ध गराउने तर अन्य कुनै पनि सर्त पूरा गर्न नसक्ने निर्णय गरेको जानकारी साइट कार्यालयलाई गराएको छ ।
परिवारजनलाई रोजगारी, लालनपालन र शिक्षाको खर्च गर्न नसक्ने आयोजनाले प्रष्ट पारेको कार्कीले बताए । ‘हामीले व्यवस्थापनको निर्णय बारेमा परिवारलाई जानकारी गराएका छौं उहाँहरुले आफ्नो अडान छोडेर शव बुझ्न मान्नु भएको छैन,’ कार्कीले भने । तर परिवारजन भने आयोजनाले कम्तीमा २० लाख दिनु पर्ने मागका सम्बन्धमा टसमस भएको छैन ।
तर स्थानीयहरूले कटुवालका सन्तानको लालनपालन र भविष्यप्रति आयोजना गम्भीर बन्नुपर्ने अडान राखेको थापाले भने ।
जिल्ला प्रहरी कार्यालय रामेछापका प्रहरी नायव उपरीक्षक होमबहादुर पराजुलीले तीन दिनदेखि अलपत्र परेको शव बुझाउनका लागि रामेछाप र सोलु तर्फबाट पहल भइरहेको बताए । दुगड समूहबाट निर्माणाधीन जलविद्युत आयोजनामाथि स्थानीयले यसअघि पनि विभिन्न माग राख्दै आएकोमा उक्त मागप्रति आयोजना संवेदनशील नभएको गुनासो जनप्रतिनिधिहरुले गर्दै आएका छन् । जग्गाको मुआव्जा, सडक निर्माण, वातावरणमा असर, पानीको उपयोग, वनजंगलको विनास, क्षतिपूर्ति र रोजगारी लगायत विषयमा विगतदेखि स्थानीयले उठाउँदै आएका छन् ।
source – www.ekantipur.com
