कालिञ्चोकमा यो वर्षकै पहिलोपटक हिमपात, पर्यटकलाई निम्तो

श्याम खतिवडा
दोलखा २ माघ,,
प्रसिद्ध तीर्थस्थल दोलखाको कालिञ्चोक क्षेत्रमा मंगलबारबाट हिमपात सुरु भएको छ ।
यो वर्षकै पहिलोपटक हिमपात भएपछि दोलखाका उच्च हिमाली क्षेत्रका किसान र कुरी उपत्यकाका होटल व्वसायीहरु खुसी भएका हुन् । हिमपातले चिसो बढाएपनि धार्मिक आस्थासंगै हिउँको आनन्द लिन दोलखा आउनेहरुमा उत्साहा थपिएको स्थानीय बासिन्दाहरु बताउछन् । मंगलबार मध्यान्हदेखि परेको हिमपात लगातार भैरहेको स्थानीय होटल व्यवसायी डम्बर बहादुर तामाङले जानकारी दिए । कालिञ्चोकसँगै दोलखाका उच्च हिमाली क्षेत्रमा सुरु भएको हिमपातले किसानहरुमा समेत उत्साहा थपिएको छ । यो समय त्यस क्षेत्रका किसानहरुका लागि मुख्य आलु खेति गर्ने समय हो । लामो समयदेखि वर्षा र हिमपात नहुँदा चिन्तित बनेका किसानहरुसमेत उत्साहित बनेका छन् ।
दोलखा सदरमुकाम चरिकोटबाट १७ किलोमीटरको दूरीमा रहेको कालिञ्चोक ३८४२ मीटरको उँचाईमा रहेको छ । हरेक बर्ष पुष देखि चैत्रसम्मै हिमपात हुने कालिञ्चोकमा पर्यटकहरु धार्मिक आस्था र प्राकृतिक सौन्र्दयको लागि पुग्ने गर्छन । चरिकोटबाट कुरीसम्म कच्ची प्रकृतिको सडक रहेको कालिञ्चोकमा उपत्यकाबाट अत्यधिक पर्यटक पुग्ने गरेको स्थानिय होटल व्यवसायी चन्द्र कुमार लामाले जानकारी दिए । लामाका अनुसार हिमपात पछि स्कि खेल खेल्न र मनोरम दृश्य अवलोकन सहित मन्दिर दर्शन गर्न धेरैजसो युवायुवतिहरुले कालिञ्चोक क्षेत्रलाई प्राथमिकतामा राख्ने गरेका छन् । त्यसबाहेक अन्य धार्मीक पर्यटकहरुपनि हिमपात भएको बेला मन्दिर पुग्न रुचाउने गरेको त्रिपुरा रिसोर्ट कुरीका सञ्चालक समेत रहेका व्यवसायी लामाको भनाई छ ।
कालिञ्चोकको मुख्य आकर्षण भनेको टाकुरोमा रहेको कुण्ड हो । अग्लो टाकुरोमा सधै जलयुक्त कुण्ड हुनु कालिञ्चोकको मुख्य विशेषता भएको स्थानिय जेष्ठ नागरिकहरु बताउछन् । कालिञ्चोकमा पुग्ने पर्यटकहरुले आफ्नो मनोकामना पूरा होस् भन्दै घण्टा र त्रिशुल चढाउने गर्दछन् । यो मन्दिरमा एउटा मात्रै वरदान माग्दा पूरा हुने जनविश्वास रहेको छ ।
विगतमा उपत्यका र दोलखा तथा आसपासको जिल्लाबाट मात्र पर्यटक पुग्ने गरेको कालिञ्चोकमा अहिले तराई तथा भारतीय दर्शनार्थीहरुको संख्यामा उल्लेख्य वृद्धि भएको दिकि होटेल प्रा.लि.का सञ्चालक डम्बर बहादुर तामाङले बताए । विशेषगरी शुक्रबार र शनिबार आन्तरिक तथा बाह्य पर्यटकको भिड लाग्ने दोलखामा हिमपात भएपछि पर्यटकको संख्यामा वृद्धि हुने होटल सञ्चालक तामाङको भनाई छ । कालिञ्चोकमा सडकमार्ग सकिएलगत्तै कुरीबाट केवलकारको समेत सुविधा रहेकोले पर्यटकलाई मन्दिरसम्म पुग्न सहज छ ।