दोलखा २६ भदौ
दोलखाको भीमेश्वर नगरपालिका ७ मगरटोलस्थित सिंहरामकी ५० वर्षिय महिलालाई स्तन क्यान्सर भई उपचारका लागि रकम अभाव भएपछि तरुण नेता विकास खड्काले अर्थिक सहयोग गरेका छन् ।
भीनपा ७ की धनकुमारी मगरको स्तन क्यान्सर भएको र निजको आर्थिक अवस्था अत्यन्तै कमजोर रहेकाले तरुण दल दोलखाका सहसचिब विकास खड्काले आर्थिक सहयोग गरेका हुन् । शुक्रबार क्यान्सर पिडित महिला मगरको घरमै पुगेर खड्काले नगद ५ हजार सहयोग गरे । उनको उपचारका लागि अस्पतालले ८ लाख खर्च लाग्ने भनेपछि मगर दम्पत्ति यतिबेला पुरै तनाबमा छन् । स्तन क्यान्सर बाट पिडित दोलखाकी एक विपन्न महिलाले आफु गरिब भएकै कारण उपचार गर्न नसके पछि सहयोगको याचना गरेकी छन् । तरुण नेता खड्काले उनलाई थप सहयोग गर्ने जनाएका छन् । अहिले तत्काललाई बिरामीलाई इच्छा अनुसार खाना खुवाउन सुरुमा थोरै सहयोग गरेपनि क्रमश सहयोग गर्नुका साथै अन्य सहयोग जुटाउन समेत आफु लागि पर्ने खड्काले जनाएका छन् ।
सिंहरामकी ५० वर्षिय विपन्न महिला धनकुमारी मगरले उपचारका लागि रकम अभाब भएकै कारण मर्नुपर्ने अवस्था आएको भन्दै सहयोगको याचना गरेकी हुन् । आर्थिक स्तर अत्यन्त कमजोर रहेको उनको परिवारमा श्रीमान र श्रीमती मात्रै छन् । वृद्ध अवस्थाका उनका श्रीमानको अन्य कुनै आम्दानीको स्रोत छैन । उनिहरुको सिंहराम भन्ने ठाउँमा २ रोपनी पाखाबारी रहेको र त्यसैमा सामान्य खेतिपाति गरी जिविकोपार्जन गर्दै आएका मगर दम्पति यतिठुलो र डरलाग्दो क्यान्सर रोगले आक्रमण गरेपछि पुरै चिन्तामा छन् । धनकुमारीको दाइने स्तनमा लामो समय अघिदेखि एउटा सानो गाँठो थियो । उनका अनुसार सोही गाँठो क्रमस बढ्दै गएको र पिडा हुन थालेपछि असार दोस्र्रो साता उनिहरुले चरिकोटको स्थानीय स्वास्थ्य संस्थामा जाँच गरेका थिए ।
स्वास्थ्यकर्मीहरुले उक्त गाँठोका कारण स्तनमा क्यान्सर भएको हुनसक्ने भन्दै काठ्माण्डौ जान सुझाएका थिए ।
भक्कानिदै उनका श्रीमान राम बहादुर मगरले भने “पासमा एक रुपैंया थिएन , घरबारी धितो राखेर चरिकोटको आरम्भ लघुवित्त बाट १ लाख ऋण झिकेर काठ्माण्डौ लगेँ, नभन्दै क्यान्सर नै लागेको रहेछ” । उनले श्रीमतिलाई भक्तपुरस्थित क्यान्सर अस्पताल भर्ना गरेको र असार १७ गते स्तन क्यान्सर लागेको रिपोर्ट आएको बताए । झण्डै एक साता काठ्माण्डौमा बसेर उपचार गर्दा ऋण लिएको एक लाख रकम सकिएपछि निरास हुदै उनिहरु घर फर्किए ।
गहभरी आँसु पार्दै राम बहादुरले भने अहिले दैनिकै पिडा छ , उपचारका लागि काठमाण्डौ लैजान अरु खर्च त परै जाओस गाडीभाडा समेत हामीसँग छैन । अस्पतालले दिएका कागजातहरु देखाउदै उनले भने ‘सन्तान पनि भएनन्, भएकी एउटी श्रीमतिलाई पनि यस्तो रोग लाग्यो ,लौ न हजुर मेरी श्रीमति बचाउन सहयोग गरिदिनुस ’ । उनकी श्रीमति धनकुमारीले आफु पैसा नभएकै कारण मनुपर्ने भएको भन्दै इच्छा हुनेहरुलाई जतिसक्दो सहयोग गरिदिन अनुरोध गरेकी छन् ।
उपचारका लागि ८ लाख खर्च लाग्ने
भक्तपुर क्यान्सर अस्पतालले उनको उपचारका लागि ८ लाख खर्च लाग्ने बताएको उनिहरुले जनाएका छन् । पारिवारिक अवस्था हेर्दा ८ लाख त के ८ हजार पनि खर्च गर्नसक्ने क्षमता देखिदैन । अस्पतालले खर्च लाग्ने ८ लाखमध्ये ७ लाख जुटाएर आए १ लाख राज्यको तर्फबाट विपन्न नागरिक उद्धार कोषमार्फत छुट गरिने जनाएको थियो । शुक्रबार उनको त्यो अवस्था सुनेपछि भीमेश्वर ७ का केही अगुवाहरुसहित हामी उनको घर सिंहराम पुगेका थियौं । १ तले सामान्य घर र एउटा कटेरोमा दुखले जिविकोपार्जन गर्दै आएका उनिहरुको अवस्था विहान बेलुका मुख जोर्न समेत धौ धौ रहेको देखियो । यस अघि उनको उक्त समस्याका बारेमा जानकारी प्राप्त भएपछि आफुले साथिभाइसँग सल्लाहा गरेको र ३५ हजार रकम सहयोग गर्न केही युवाहरु तयार रहेको भीनपा ७ का स्थानीय अगुवा शंकर कार्कीले जानकारी दिए । उनले इच्छा अनुसार सबैले सहयोग गरे मगर दम्पतिको घाउमा थोरै भएपनि मलहम लगाउन सकिने बताएका छन् । उनलाई चरिकोटस्थित भीमेश्वर नगरपालिकाले १० हजार रकम अस्पताल जान बाटो खर्च बापत उपलब्ध गराउन सकिने जनाएको छ । नगरका स्वास्थ्य शाखा प्रमुख श्याम खड्काले दिर्घरोगीहरुलाई १० हजार रुपैंया अस्पताल जाने खर्च बापत दिइने र उनको अस्पताल भर्ना भएपछि एक लाख छुटका लागि सिफारिस गर्न सकिने बताएका छन् ।
कसरी गर्ने सहयोग
मगर दम्पतिलाई सम्पर्क गर्न उनिहरुको आफ्नै मोवाइल फोन पनि छैन । केही पर्दा उनिहरुले आफ्नी भतिजीको मोवाइलमा कुरा गर्ने गरेका छन् । भतिजीको सम्पर्क नम्बर ९८२४८३७८०३ मा सम्पर्क गरि इच्छुक व्यक्तिहरुले सिधै सहयोग समेत उपलब्ध गराउन सक्नेछन् । त्यसबाहेक धनकुमारी मगरको आफ्नै बैंक खाता समेत रहेको छ । उनको महाँलक्ष्मी विकास बैंक चरिकोट शाखामा रहेको खाता नम्बर ०५३१०२००२८५१८१०००००१ मा जम्मा गर्न समेत सकिने जनाइएको छ ।
