दोलखामा आयोजना हुने राष्ट्रिय रेस्लिङ्ग प्रतियोगिताको तयारी पुरा

श्याम खतिवडा
दोलखा १२ कार्तिक,,,
हिमाली जिल्ला दोलखाको सदरमुकाम चरिकोटमा पहिलोपटक आयोजना हुन लागेको हाईअल्टिच्युड राष्ट्रिय रेस्लिङ्ग प्रतियोगिताको तयारी पुरा भएको छ ।
प्रदेश खेलकुद परिषद र रिङ रेस्लिङ्ग संघको संयुक्त आयोजनामा यही कात्र्तिक १३ गते चरिकोटस्थित भ्युटावर खेलमैदानमा हुने हाईअल्टिच्युड राष्ट्रिय रेस्लिङ्ग प्रतियोगिताको तयारी पुरा भएको हो । प्रतियोगितामा देशभरका १७ जना पुरुष तथा महिला रेसलरहरुले प्रतिष्पर्धा गर्ने रेस्लिङ संघकी केन्द्रिय महासचिब सुवर्ण श्रेष्ठले जानकारी दिनुभयो ।
खेल क्षेत्रको विकाससँगै कोभिड महामारीले थलिएको पर्यटन क्षेत्रलाई टेवा पु¥याउने उद्देश्यले दोलखामा प्रतियोगिता आयोजना गरिएको र प्रतियोगिताको सम्पुर्ण तयारी पुरा भएको महासचिब श्रेष्ठले जानकारी दिनुभयो । प्रतियोगिता आयोजक टोलीले सर्वसाधरणहरुका लागि चरिकोट बजारबाट भ्युटावर खेलमैदानसम्म पुग्न २ वटा बसको समेत व्यवस्था गरेको छ । भ्युटावर खेलमैदानमा मञ्च व्यवस्थापन, साउण्ड सिस्टम जडान जस्ता सबै कामहरु सकिएको आयोजकले जनाएको छ । शुक्रबार सबै खेलाडीहरु सदरमुकाम भित्रीने र उनिहरुलाई भीमेश्वर नगरपालिकाले औपचारिक रुपमा स्वागत गर्ने कार्यक्रम रहेको छ । नगरपालिकाको तर्फबाट नगर प्रमुख भरत बहादुर केसीले एक औपचारिक कार्यक्रमका बिच स्वागत गर्ने भीमेश्वर नगरपालिकाले जनाएको छ । प्रतियोगिताको विभिन्न सञ्चार माध्यमहरुबाट प्रत्यक्ष प्रसारण समेत गरिने महासचिब श्रेष्ठले जानकारी दिनुभयो ।
प्रतियोगितामा नुवाकोटे टाइगर,थागु, डेभिड, साइन, टुप्पी ग्याङ, एक्स हिरो, लेडी एञ्जल, तन्नु , सिजे, एमसी जोन लगाएतका महिला तथा पुरुष खेलाडीहरु सहभागी हुने जनाइएको छ । प्रतियोगितामा हेभी वेट च्याम्पियनले १ लाख ५० हजार , हार्डकोर च्याम्पियनले १ लाख २० हजार , मिडल वेट च्याम्पियनले ८५ हजार , ट्याग टिम च्याम्पियनले ७५ हजार , लाइट वेट च्याम्पियनले ५० हजार र ट्रिपल थ्रेट च्याम्पियनले ४५ हजार नगद सहित मेडल र प्रमाणपत्र पाउने छन् । प्रतियोगितामा प्रदिप पाण्डे , विकास खड्का र शिसम मैनालीले रेफ्रीको भुमिका निर्वाहा गर्ने आयोजकले जनाएको छ ।
हिमाली जिल्लाहरुमा पनि रेस्लिङ खेलको विकास गराउन र २ हजार मिटर भन्दा माथिल्लो क्षेत्रमा रेस्लिङ आयोजना गरिनुका साथै नेपालमा रेस्लिङको विकास तथा खेलाडी उत्पादन गर्ने उद्देश्यले प्रतियोगिताको आयोजना गरिएको बागमती प्रदेश सरकार अन्तर्गतको प्रदेश खेलकुद परिषदले जनाएको छ । नेपालमा उत्पादीत खेलाडी अन्तराष्ट्रीय क्षेत्रमा प्रतिष्पर्धा गर्न योग्य बनाउने लक्ष्यका साथ प्रतियोगिताको आयोजना गरिएको महासचिब श्रेष्ठको भनाई छ । प्रतियोगिता सम्पन्न गर्न २९ लाख बजेट खर्च हुने आयोजकको अनुमान रहेको र उक्त बजेट व्यवस्था भैसकेको जनाइएको छ ।