Gaurishankar Post
नेपाल समाचार रोचक

दोलखामा एक सय पाँच वर्षीया वृद्धालाई नागरिकता

२०७७ पौष २८ मंगलबार

दोलखाको मेलुङ गाउँपालिका– ३ घ्याङकी एक सय पाँच वर्षीया वृद्धाले नागरिकता लिएकी छिन् । एक सय पाँच वर्षीया दुर्गमाया कार्कीलाई नागरिकता दिलाउन सिफारिस र कागजपत्र बोकेर मेलुङ– ३ घ्याङका वडाध्यक्ष हिरा थोकरसहित उनको माइती पक्ष मंगलबार बिहान जिल्ला प्रशासन कार्यालय पुगेको थियो । 

कागजात सबै जुटेपछि केहीबेरमै बनेको नागरिकता प्रमुख जिल्ला अधिकारी रमेशप्रसाद सिवाकोटीले कार्कीलाई हस्तान्तरण गरे । नागरिकतामा कार्कीको जन्ममिति वि.सं. १९७२ भदौ १८ कायम भएको सिवाकोटीले जानकारी दिए । 

दोलखाको तामाकोसी गाउँपालिका– ४ मालुमा जन्मेकी कार्कीले मेलुङ– ३ घ्याङमा २००१ सालमा इन्द्रबहादुर कार्कीसँग विवाह भएको सर्जिमिन मुचुल्कामा खुल्न आएको छ ।  विवाह गर्दा आफू सानै रहेको र कति वर्षको थिएँ भनेर याद नरहेको उनले बताइन् । 

विवाहपछि घ्याङ गाउँमै उनकी एउटी छोरी जन्मिइन् । छोरी जन्मिएलगत्तै ०४० सालमा उनका  श्रीमान् बिते । श्रीमान्को निधनपछि छोरी साथमा लिएर उनी पुनः माइत फर्किएर उतै बस्न थालिन् । ‘हजुरबुबा बितेपछि हजुरआमा र आमा यतै माइत बस्न थाल्नुभएछ,’ उनका नाति स्थानीय शिक्षक बाबुराम खत्रीले भने, ‘यता बस्न थालेपछि नागरिकता बनाउन जाऊँ वृद्धभत्ता आउँछ भन्दा कहिल्यै मान्नुभएन, अहिले वडाले भनेपछि आफैँले नागरिकता बनाइदेऊ भन्नुभयो ।’ 

एक सय पाँच वर्षको उमेरमा उनले श्रीमानकै थरबाट वंशजको आधारमा नागरिकता पाएकी छिन् । उनको नागरिकता बनाउन दुर्गमायाका भतिज गोकुलबहादुर कार्कीले सनाखत गरेको जिल्ला प्रशासन कार्यालय दोलखाले जनाएको छ । 

भूकम्पपछि दुर्गमाया बस्दै आएको घर भत्किएको र पटक–पटक गुनासो फाराम भर्दा यसपालि उनको लाभग्राही सूचीमा नाम प्रकाशन भएको थियो । पुनर्निर्माण प्राधिकरणको प्रक्रियाअनुसार घर निर्माण सम्झौता गर्न नागरिकता आवश्यक पर्ने भएकाले उनले नागरिकता बनाउन चासो गरेको मेलुङ गाउँपालिका– ३ का वडाध्यक्ष हिरा थोकरले जानकारी दिए । 

नागरिकता बनेसँगै उनको घर निर्माण गर्न सामाजिक सुरक्षा भत्ता लिने बाटो खुलेको दोलखाका प्रमुख जिल्ला अधिकारी सिवाकोटीले बताए । सिवाकोटीले उनको अंशकै कारण यसअघि नागरिकता नबनेको हुन सक्ने बताए । उनले एक सय पाँच वर्षको उमेरमा नागरिकता लिने दुर्गमाया दोलखाकै पहिलो नागरिक भएको बताए ।

याे पढ्न छुटाउनु भयाे की ?

ज्वरो आएका बिरामीलाई विगु गाउँपालिकाको एक एक थान डिजिटल थर्मोमिटर

shyam khatiwada

प्राविधिक निरिक्षण गर्न माथिल्लो तामाकोसीको विद्युत एक साता बन्द हुने

shyam khatiwada

२८ वर्षपछि दोलखामा विजयको झण्डा फहराउने अभियानमा कांग्रेस, कसिलो बन्दै गठबन्धन

shyam khatiwada
Gaurishankar Post