दोलखा १९ साउन
३ दिन अघिको अबिरल बर्षाका कारण सुनखानी साङ्बा सडक अबरुद्ध भएपछि बेगुम्पा र क्याङ्पोल गाउँमा थुनिएका ३ वटा बोलेरो जिप बैकल्पीक मार्गबाट उद्धार गरिएको छ ।
कालिञ्चोक गाउँपालिकाले स्काभेटर मेसिनको प्रयोग गरि खोपाचागु र कालिञ्चोकको सिमानामा रहेको सोरुङ खोला भनिने माहुरेबाट अलपत्र परेका बोलेरो जिपको उद्धार गरेको हो । मेसिनले खोला फराकिलो बनाएर खोपाचागुको तुनमुन हुदै सिंगटी पुग्ने गरि बोलेरो गाडीहरु पठाइएको कालिञ्चोक १ का वडा अध्यक्ष पदम थामीले जानकारी दिए । २ दिन अघिको अबिरल वर्षातका कारण सुनखानी साङ्बा सडकखण्डको क्याङ्पोल र मुङ्चाको बिचमा पर्ने हेलेक्पाथली भनिने स्थानमा झण्डै एक सय मिटर सडक भासिएको थियो । पहिरोले सडक अवरुद्ध हुँदा कालिञ्चोक १ का दर्जनौं बस्तीहरु सडक सञ्जालको सम्पर्कबाट टुटेका छन् । कालिञ्चोक गाउँपालिकाका उपाध्यक्ष कुल बहादुर बुढाथोकीले तत्काल सडक सञ्चालन गर्न नसकिने बताउदै वैकल्पीक उपायबारे छलफल भैरहेको जानकारी दिए ।
