मेलुङ गाउँपालिकाको करिडोर सडक , ७ किलोमिटर ट्रयाग खन्न १ करोड

श्याम खतिवडा
दोलखा ६ भदौ
दोलखाको मेलुङ गाउँपालिकाले २०७४ बाट निर्माण सुरु गरेको करिडोर सडकमा ७ किलोमिटर ट्रयाग खन्न १ करोड बजेट खर्चिएको तथ्य सार्वजनिक भएको छ ।
गाउँपालिकाको रणनितिक महत्वको सडक भन्दै वर्षेनि बजेट विनियोजन गरी ७ किमी सडकको ट्रयाग खुलाउन एक करोड बजेट खर्च गरेको हो । स्थानीय तहको निर्बाचन पछि जनप्रतिनिधिको महत्वकांक्षी आयोजना भन्दै वर्षेनी करोडौं बजेट विनियोजन गरि काम अघि बढाउदा पनि ७ किलोमिटर सडकको ट्रयाग खुलाउनमात्रै ४ वर्ष समय लागेको स्थानीयहरुले बताएका छन् । मालुखोलादेखि चरंगेसम्मको १३ किलोमिटर सडक मध्ये यसअघिनै डिभिजन सडक कार्यालयले ६ किलोमिटरमा ट्रयाग खुलाइसकेको थियो । मालुखोलाबाट घ्याङसुकाठोकरको कल्लेरीसम्म तयार भैसकेको सडकबाट कल्लेरी देखि चरंगे सम्म ७ किलोमिटर ट्रयाग खुलाउदा पटक पटक गरि एक करोड बजेट खर्च भएको गाउँपालिकाले जनाएको छ ।
खनिएको सडकको ट्रयाग हेर्ने हो भने सवारी साधन त के जनावर पनि सहज ढंगले हिड्न नसक्ने स्थानीय बासिन्दाको गुनासो छ । मेलुङ गाउँपालिकाले आर्थिक वर्ष २०७४/७५ मा ३० लाख , ०७५/०७६ मा ८० लाख र ०७६/७७ मा प्रदेश सरकारले ७० लाख गरि उक्त सडकमा हालसम्म १ करोड ८० लाख बजेट विनियोजन भएको देखिन्छ । गाउँपालिकाका इन्जिनियर राजकुमार श्रेष्ठका अनुसार आ.व. ०७५/०७६ मा विनियोजित ८० लाख बजेट भने काम गर्न नसकेर फ्रिज भएको थियो । बाँकी २ आर्थिक वर्षको गरि १ करोड बजेट उक्त सडकको ट्रयाग खुलाउन मात्रै खर्च भएको मेलुङ गाउँपालिकाले जनाएको छ । अहिले उक्त सडकको अवस्था हेर्दा दयनिय मात्रै होइन सरकारी बजेटको कसरी दुरुपयोग हुन्छ भन्ने नमुनाका रुपमा उक्त सडकलाई हेर्नुपर्ने मेलुङका स्थानीय युवा सुकदेब भण्डारी बताउछन् । उनका अनुसार दुर्गामी लक्ष्यबिना अध्ययनै नगरि उक्त सडकमा गरिएको लगानीले मेलुङबासीलाई कुनैपनि लाभ हुने छैन । गाउँपालिकाका ३ वटा वडाहरु भेड्पु ,घ्याङसुकाठोकर र पवटीको तल्लो भाग जो अत्यन्तै उर्बर र खेतियोग्य जमिन रहेको क्षेत्र भएपनि किसानलाई कुनै किसिमको क्षेतिपुर्ती समेत उपलब्ध नगराई मनलागी सडक खनिनुले कृषकको भावनामा समेत चोटपुगेको स्थानीय रामकुमार कार्कीले बताए । उक्त सडक निर्माण गर्दा भेडपुको बगुवा बेसी , घ्याङको ठुलीबेसी र पवटीको खेतियोग्य जमिन प्रयोग गरिएको छ । जसका कारण वषर््ेानी झर्ने पहिरोले क्षेती गराएको र किसान चिन्तीत हुने गरेको पिडितहरुले जनाएका छन् ।
मालुखोला गोलेगाउँ धनुके सडक समेत अस्तब्यस्त
मालुखोला बजारबाट गोलेगाउँ हुदै गाउँपालिका केन्द्र जोडिने मालुखोला गोलेगाउँ धनुके सडक समेत अस्तब्यस्त छ । लामो समयदेखि सन्चालनमा आएको उक्त सडकमा जनप्रतिनिधि आएदेखि बर्षेनि बजेट विनियोजन हुन्छ तर प्रभाबकारी काम नहुँदा सो सडकमा २ वर्षदेखि सवारी साधन समेत चल्न छोडेको भेड्पुका मोहन विक्रम कार्कीले जानकारी दिए । उनका अनुसार सुरु सुरुमा रोल्वालिङ यातायातले २ वर्ष अघिसम्म नियमित सेवा दिइरहेपनि बाटोकै खराबीका कारण २ वर्षदेखि उक्त सडकमा सार्वजनिक सवारी साधनहरु चल्न सकेका छैनन् । हिउँदको समयमा दुखले बोलेरो जिपहरु चलेपनि अरुबेला भने केही साधन पनि चल्ने अवस्था छैन । तर सोही सडक स्तरोन्नती तथा निर्माणका लागि भन्दै मेलुङ गाउँपालिकाले वर्षेनी लाखौं बजेट विनियोजन गरि काम गरिरहेको छ । सुचना अधिकारी पौडेलका अनुसार उक्त सडकमा हालसम्म १ करोड ५३ लाख रुपैंया बजेट खर्च भैसकेको छ । स्थानीयहरुले कामको प्रगति सुन्य तर करोडौं बजेट सकिएको भन्दै छानविनका संवैधानीक निकायको ध्यानाकर्षण गराइदिन सञ्चारकर्मीहरुसँग अनुरोध समेत गरेका छन् ।
नदिजन्य सामाग्री उत्खननका लागि खनिएको हो गाउँपालिका
मेलुङ गाउँपालिकाका प्रवक्ता हिरा थोकरले पालिकाको आन्तरिक आम्दानी कमजोर रहेको र नदिजन्य सामाग्री उत्खनन गर्दा राजश्व संकलन हुने भएकाले उक्त सडकलाई प्राथमिकताका आधारमा निर्माण गरिएको बताए । उनले आन्तरिक समस्या लगाएत केही प्राविधिक कारणले सडक निर्माणमा ढिलाई भएको स्विकार्दै छिटै निर्माण सम्पन्न हुने गरि गाउँपालिका अघि बढिरहेको जनाएका छन् । वडाअध्यक्ष समेत रहेका प्रवक्ता थोकरले चालु आर्थिक वर्षका लागि पनि सो सडकका लागि १ करोड बजेट विनियोजन भएकाले प्रभाबकारी काम हुने जनाएका छन् । प्रवक्ता थोकरले करिडोर सडक उत्तर दक्षिण लोकमार्गलाई समेत लक्षित गरि निर्माण गरिएको जनाएका छन् । उनले मालुखोला गोलेगाउँ सडकपनि सुरुमा बिना अध्ययन निर्माण गरिएको र वर्षेनी मर्मत गर्दा खर्च धेरै हुने गरेको बताउदै चालु आर्थिक वर्षबाट उक्त सडकलाई व्यवस्थीत बनाउनेमा गाउापालिका कृयाशिल रहेको जानकारी दिएका छन् ।
फोटो
दोलखाको जफेबाट देखिने मेलुङ गाउँपालिकाको तामाकोसी करिडोर सडकको ट्रयाग । तस्बिर गौरीशंकरपोष्ट।