Gaurishankar Post
Image default
कबिता

यात्रा गरिरहेछु

एमबी खड्का

लासहरुको मौन जुलुसमा

सुटुक्क छिरेर साँझ पख

तिम्रो घर देखि मेरो घाट सम्म

तिम्रो आँगन देखि मेरो चिहान सम्म

यात्रा गरिरहेछु

जडौरिमै काटेको हो जुनि

गरिबिमै त फाटेको हो मन

मरे पछि त कमसेकम

एकसरो नयाँ कात्रो फेर्ने

रहर हुंदो रहेछ साथी !

दौंतरी मलामिहरुको काँधमा चढेर

गएं है ? भन्दै गाउँ तीर

घाट सम्न पुग्ने रहर हुंदो रहेछ

आरामले पल्टिएर चित्तामा

खरानी भएर अलिअलि

धुंवा भएर अलि अलि

माथी धेरै माथी आकासमा

निस्फिक्री भएर उड्ने

रहर हुंदो रहेछ

हेरून न ती दौंतरी मलामिहरु

अनि हेरुन न त

ती नवजात टुहुराहरु

हात हल्लाएर बिदा गरून भन्ने

रहर हुंदो रहेछ

यात्रा गरिरहेछु

लासहरुको मौन जुलुसमा

सुटुक्क छिरेर साँझ पख

तिम्रो आँगन देखि मेरो चिहान सम्म

यात्रा गरिरहेछु ।

याे पनि हेर्नुहोस

आऊ साथी रांका बालौं – केशवराज चौलागाई

shyam khatiwada
गाैरीशंकर पाेष्ट
Online News Portal