दोलखा १० साउन,,
होटल व्यवसायीहरुले महंगो शुल्क लिने गरेको चौतर्फी गुनासो आएको भन्दै दोलखाको सरकारी टोलीले सोमबार कालिञ्चोकको कुरी क्षेत्रमा सञ्चालित होटलहरुको अनुगमन गरेको छ ।
जिल्ला समन्वय समिति, कालिञ्चोक गाउँपालिका , प्रमुख जिल्ला अधिकारी लगाएतको सरकारी टोलीले सोमबार समग्र कालिञ्चोक क्षेत्रको अनुगमन गर्दै होटल व्यवसायीहरुलाई जनैपुर्णिमा सम्म अनिवार्य रुपमा होटलमा मेनु राख्नुपर्ने निर्देशन दिएको हो । कुरीमा सञ्चालित कतिपय होटलहरुले अहिलेसम्म परिकार सहितको मुल्यसुचि नराखेको र ग्राहकहरुलाई आफ्नै ढंगले मुल्य लिएको गुनासो आएपछि होटलहरुको संयुक्त अनुगमन गरि मुल्यसुचि अर्थात मेनु राख्न निर्देशन दिइएको कालिञ्चोक गाउँपालिकाका अध्यक्ष अर्जुन प्रसाद शिवाकोटीले जानकारी दिए । उनका अनुसार कतिपय होटल व्यवसायीहरुले मुल्यसुचि बिना ब्यापार गर्दै आएको र जसका कारण ग्राहकवर्गमा अन्योलता शिर्जना भएकाले समय र परिस्थितीलाई मध्येनजर गर्दै उचित मुल्य सहितको सुचि प्रत्येक टेबलमा राखिनुपर्ने जनाएका छन् ।
अनुगमनका क्रममा दोलखाका प्रमुख जिल्ला अधिकारी कोमल प्रसाद धमलाले करोडौंको लगानीमा बनेका होटलमा मेनु नहुनु दुखद भएको बताउदै तोकिएको समय अर्थात भदौ १४ गते जनैपुर्णिमाको दिनसम्म सबै होटलहरुले आ आफ्नो मुल्यसुचि नराखे नियम अनुसार कारबाही गरिने जनाएका छन् । उनले मेनु व्यवसायीक दृष्टिले पनि अपरिहार्य रहेको जनाउदै यसमा प्रशासनले ताकेता गर्नुपर्ने विषय नभएको जनाएका छन् । अनुगमन टोलीले कालिञ्चोक मन्दिर भित्र क्षेत्रफल ओघटेर राखिएका त्रिसुल तथा अन्य पुजा सामाग्रीहरु अन्यत्र व्यवस्थापन गर्न र मन्दिर परिषरसँग जोडेर बनाइएका संरचनाहरुसमेत हटाउन निर्देशन गरेको दोलखाका प्रमुख जिल्ला अधिकारी कोमल धमलाले जानकारी दिए । कुरीमा साना ठुला गरी झण्डै ७० को हाराहारीमा होटलहरु सञ्चालनमा छन् ।
कालिञ्चोक गाउँपालिकाले कालिञ्चोक मन्दिरलाई व्यवस्थित गर्न र आन्तरिक तथा बाह्य पर्यटकको रोजाइमा पार्न आवश्यक तयारी गरिरहेको गाउँपालिका अध्यक्ष अर्जुन शिवाकोटीले जनाएका छन् । अनुगमन टोलिमा जिल्ला समन्वय प्रमुख बर्जुराम घतानी, कालिञ्चोक गाउँपालिका अध्यक्ष अर्जुन शिवाकोटी, प्रमुख जिल्ला अधिकारी कोमल प्रसाद धमला , दोलखाका प्रहरी प्रमुख दिपक खड्का लगाएत सहभागी थिए ।
कुरीका होटलको सरकारी अनुगमन , जनैपुर्णिमा सम्म अनिवार्य मेनु राख्न निर्देशन
