दोलखामा एकै दिन २ सुरक्षाकर्मी सहित ६ जनामा कोरोना पुष्टी

दोलखा ६ भदौ
दोलखामा एकै दिन २ जना सुरक्षाकमी सहित ६ जनालाई कोरोना पुष्टी भएको छ ।
भदौ २ गते भीमेश्वर नगरपालिकाबाट ६२ जनाको स्वाब संकलन गरि परिक्षणका लागि पठाइएकामध्ये २ सुरक्षाकर्मी सहित ६ जनामा कोरोना पुष्टी भएको हो । जिल्ला प्रहरी कार्यालय दोलखाका अनुसार भर्खरै तालिम सम्पन्न भई पासआउट भएर दोलखा खटिएका २ जना जवानहरु जिल्ला भित्रीएदेखिनै क्वारेन्टाइनमा थिए । क्वारेन्टाइन अवधि पुरा हुनै लाग्दा मंगलबार उनिहरु सहित ६२ जनाको स्वाब संकलन गरि परिक्षणका लागि धुलिखेल अस्पताल पठाइएको थियो । शनिबार साँझ कोरोना पोजेटिभ रिपोर्ट आएलगत्तै उनिहरुलाई आइसुलेसनमा पठाइएको जिल्ला प्रहरी कार्यालय दोलखाले जनाएको छ । कोरोना पुष्टी भएका अन्य ४ जना भने ३ जना एनजीओकर्मी र एक जना स्वास्थ्यकर्मी रहेको जिल्ला स्वास्थ्य कार्यालयले जनाएको छ । मंगलबार भीमेश्वर नगरपालिका सहित जिल्लाभरका ३ सय ३ जनाको स्वाब संकलन गरि पठाइएको थियो अन्यको भने रिपोर्ट आउन बाँकी रहेको दोलखाका प्रमुख जिल्ला अधिकारी भीमकान्त शर्माले जानकारी दिए ।
३ एन्जीओकर्मी र एक स्वास्थ्यकर्मीमा संक्रमण
साउन अन्तिम साता खाद्य सुरक्षा तथा पोषण सुधार आयोजना नामक एक गैरसरकारी संस्थाले चितवनको टाँडीमा साउन १५ देखि २८ गते सम्म १४ दिने तालिम आयोजना गरेको थियो । उक्त तालिममा दोलखा सहित ८ जिल्लाका ३२ जना एनजीओकर्मीहरु सहभागी थिए । तालिम सकेर जिल्ला फर्केपछि सिन्धुपाल्चोक लगाएत अन्य जिल्लाका तालिममा सहभागी एनजिओकर्मीहरुमा कोरोना संक्रमण पुष्टी भएपछि दोलखाबाट सहभागी हुनेहरुको स्वाब संकलन गरि पठाइएको थियो । उनिहरुमध्ये ३ जनाको भीमेश्वर नगरबाट र एक जनाको कालिञ्चोक गाउँपालिकाबाट स्वाब संकलन गरि पठाइएकोमा भीमेश्वरबाट पठाइएका ३ जनाको रिपोर्ट पोजेटिभ आएको छ । १ जनाको भने कालिञ्चोक गाउँपालिकाबाट स्वाब संकलन गरि पठाइएकाले रिपोर्ट आइनसकेको स्वास्थ्य कार्यालयले जानकारी दिएको छ । स्रोतका अनुसार उक्त तालिममा सहभागी अन्य जिल्लाका एनजिओकमीहरुमा समेत कोरोना पुष्टी भैसकेको छ । दोलखामा भने चितवन बाट फर्केपछि तालिममा सहभागी भएका कर्मचारीहरु चरिकोट बजार सहित अन्य क्षेत्रमा खुलेआम हिडेको र गाउँ गाउमा खटिएको बुझिएको छ । उनिहरुको सम्पर्कबारे अध्ययन गरि आइतबारबाट कन्ट्रयाक ट्रेसिङ गरिने दोलखास्थित संकट व्यवस्थापन समितिले जनाएको छ । सरकारले सभा सम्मेलन तालिम गोष्ठी तथा भीडभाड हुने गतिबिधिमा रोक लगाएपनि एउटा एनजिओले उल्लंघन गरेको र जसका कारण संंक्रमण तिब्र भएको भन्दै उक्त एनजिओलाई तत्काल कार्बाही गर्न सरोकारवालाहरुले माग गरेका छन् । शनिबार पोजेटिभ रिपोर्ट आउनेमध्ये एक जना स्थानीय स्वास्थ्यकर्मी रहेको बताइएको छ ।