बाल उद्यानमा निशुल्क भर्ना सुरु , असार १५ बाट अनलाइन कक्षा सुरु हुने

चरिकोट १ असार
चरिकोटस्थित बाल उद्यान एकेडेमी बोर्डिङ स्कुलले कोभिड १९ का कारण रोकिएको पठन पाठन उच्चतम प्रविधिको प्रयोग गरि सुचारु गर्ने भएको छ ।
इन्टरनेटको माध्यमबाट सबै विद्यार्थीहरुलाई अनुकुल हुने गरि अनलाइन कक्षा सुचारु गर्न लागेको बाल उद्यानले असारको पहिलो हप्तालाई भर्ना अभियानको रुपमा अघि बढाएको हो । लामो समयदेखि कोरोना संक्रमणको त्रासमा बन्द रहेका शैक्षिक संस्थाहरु वातावरण केही सहज भएसँगै प्रविधिको प्रयोग गरेरै भएपनि कक्षा सञ्चालनको तयारीमा छन् । बाल उद्यानका सञ्चालक सागर श्रेष्ठले बालबालिकाहरुको हितलाई मध्येनजर गरि यो अभियान अघि बढाइएको जानकारी दिए । उनका अनुसार घरमै बसेर अनलाइनका माध्यमबाट विद्यार्थीहरुलाई सहज ढंगले कक्षा चलाइने छ । नर्सरी देखि कक्षा ६ सम्म सञ्चालनमा रहेको बाल उद्यानले असार दोस्र्रो हप्ताबाट नियमित कक्षा सञ्चालन गर्ने भन्दै सबै विद्यार्थीहरुलाई तयार रहन र त्यस अघिनै निशुल्क भर्ना गर्न अविभाबकहरुलाई आग्रह गरेको छ ।
सबैको सहज पहुँच पुग्ने गरि तयार गरिएको अनलाइन कक्षा दोलखामा सञ्चालित निजी स्कुलहरुमध्ये पहिलो र प्रभाबकारी भएको स्कुलले दाबी गरेको छ । पाठको भिडियो सहित अभ्यासमुलक ढंगले पठनपाठन गराउने तयारी भैरहेको सञ्चालक श्रेष्ठले सुनाएका छन् । उनले सो विषयमा बुझ्न सबै अविभावक तथा अन्य नयाँ भर्ना गराउन चाहानेहरुलाई विद्यालयमा सम्पर्क गर्न अनुरोध गरेका छन् ।