दोलखा २८ साउन
निउरो टिप्ने क्रममा माथिबाट आएको पहिरोले पुरिदा दोलखाको विगु गाउँपालिका वडा नम्बर ७ मा एक बालकको मृत्यु भएको छ भने एक जना बेपत्ता भएका छन् ।
दोलखाको उपल्लो उत्तरी क्षेत्रस्थित बिगु गाउँपालिका वडा नम्बर ७ मा निउरो टिप्न गएका बाबुछोरालाई पहिरोले पुरिदा १२ वर्षिया बालकको मृत्यु भएको र उनका बाबु वेपत्ता भएका हुन् । आइतबार दिउसो बेलुकीको तरकारीको जोहो गर्न निउरो खोज्न हिडेका बिगु गाउँपालिका–७, राखम गाउँका अन्दाजी ३५ वर्षिय निम्दोर्जे शेर्पा र उनका १२ बर्षिय छोरा पासाङ शेर्पालाई पहिरोले पुरेको थियो । लगातार वर्षात भैरहेको बेला प्लास्टिक ओढेर निउरो खोज्न हिडेका निम्दोर्जे र उनका छोरा पासाङ लाई सामान्य ठाडो खोलामा आएको भल सहितको पहिरोले बगाएको विगु गाउँपालिका ७ का वडाअध्यक्ष दलबहादुर श्रेष्ठले जानकारी दिए । बाबु छोरा पहिरोमा पुरिएर बेपत्ता भएपछि प्रहरी चौकी चिलंखा र जनप्रतिनिधिहरुको टोलीले खोजतलास गर्दा १२ वर्षया छोरा पासाङ शेर्पाको शव भने नजिकैको अम्बाटोल मुल खोलामा भेटिएको छ । वडाअध्यक्ष श्रेष्ठले निज बालकको शव प्रहरीको रोहबरमा विगुस्थित पुरानो गुम्बामा राखिएको जनाएका छन् ।
आईतवार निम्दोर्जे उनका छोरा पासाङ र अर्का एक युवा दिल बहादुर थामी तिनपाटे नजिकैको जंगलस्थित ठाडो खोलामा निउरो टिप्न गएका थिए । निउरो टिपिरहेका बेला अनयासै आएको भल सहितको पहिरोले निम्दोर्जे र उनका छोरा पासाङलाई बगाएको थियो । दिलबहादुर भने भागेर ज्यान बचाउन सफल भएका छन् । बेपत्ता भएका निम्दोर्जेको थोरै निउरो सहितको कालो झोला पहिरोले सोरिएकै ठाउमा भेटिएको र त्यसभन्दा केही तल एकथान गम्बुट भेटिएको थियो । बेपत्ता रहेका निम्दोर्जेको खोजीकार्यका लागि सोमबार विहानदेखी नै नेपाली शेनाको टोली खटाइने दोलखाका प्रमुख जिल्ला अधिकारी कोमल प्रसाद धमलाले जनाएका छन् ।
निम्दोर्जेका दुइवटा श्रीमती थिए । पहिलो श्रीमतीले दुई छोरा र एक छोरी जन्मिएपश्चात निम्दोर्जेलाई छोडेर अन्यत्रै गएको स्थानीय छिमेकीहरु बताउछन् । जेठी श्रीमती हिडेपछि निम्दोर्जेले पुन अर्को विवहा गरेका थिए । आइतबार त्यो घटना हुँदा अर्की श्रीमती समेत कामका शिलशिलामा काठ्माडौं गएकी थिइन । बुहारी हिडेपछि नाता नातिनीहरुको पालनपोषण गर्दै आएकी अन्दाजी ७० वर्षिया आमा कमिनी शेर्पा यो खबर सुनेर भावबिहोल छिन् । आर्थिक स्थिती समेत अत्यन्तै कमजोर भएका निम्दोर्जेको मृत्यु भएपछि ति साना साना बालबच्चा , श्रीमती र वृद्ध आमाको बिचल्ली भएको वडाअध्यक्ष श्रेष्ठले बताएका छन् । छिमेकी समेत रहेका कांग्रेस नेता आङनिमा शेर्पाले राज्य र अन्य सरोकारवाला निकायले आबश्यक सहयोग गर्न नसके यो परिवारले ठुलो बिचल्ली सामना गर्नुपर्ने भन्दै त्यसतर्फ गम्भिर हुन सबैलाई अनुरोध गरेका छन् ।
दोलखाको विगुमा निउरो टिप्न गएका बाबु छोरालाई पहिरोले पुर्यो, छोराको मृत्यु बाबु अझै वेपत्ता
